Print this page

30 Juñu: Kazu Foun Covid-19 Hamutuk 104, Mate Ida Featured

By Saturnina da Costa Juñu 30, 2021 346
mediku sira ne'ebe atende pasiente Covid-19. Foto:Dok/Independente. mediku sira ne'ebe atende pasiente Covid-19. Foto:Dok/Independente.

DILI:Sala Situasaun Sentru Integradu Jestaun Krize (SIJK) relata ohin (30/06), ekipa konjunta saúde rezista tan kazu foun hamutuk 104, kompostu husi Dili na’in 28, Baucau 6,  Bobonaro 2, Covalima 1, Ermera 60 no Manatuto 2.

Nune’e, pasiente rekuperadu hamutuk 54 no kazu ativu iha izolamentu hamutuk 839.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo hatete, kazu foun ne’ebé relata ohin total proporsaun kazu sintomatiku hamutuk pursentu 1,9,”dehan nia iha komunikadu, kuarta ohin.

Enkuantu, total komulativu kazu konfirmadu hahú husi loron 21 fulan-Marsu tinan 2020 to’o loron 30 fulan-Juñu tinan 2021 hamutuk 9222.

Ho nune’e, husi horseik (29/06) mai ohin, teste PCR ne’ebé Laboratorium Nasional Saúde halo iha Dili hamutuk 797 kompostu husi, Vijilansia sentinela 5, Contact tracing 125, Random Screening 58, Viajem sai husi serka sanitaria Dili 556, Viajen internasional 33 no Follow up iha kuarentena na’in 20.

Aliende, total PCR ne’ebé halo horseik (29/06) iha Munisipiu sira seluk, RAEOA no HNGV hamutuk 355, kompostu husi Munispiu Baucau 129, Maliana 33, Ermera 26, Maubisse 20, Suai 18, Vikeke 14, RAEOA 53 no HNGV 62.

Entretantu, iha izolamentu vera Cruz, ohin halo tratamentu ba kazu detetadu hamutuk na’in 14, kompostu husi Obstetria 3 no medisina 11.

Enkuantu, SIJK rezista tan kazu mate ho Covid-19 feto na’in ida iha Izolamentu Vera Cruz.

Matebian hanesan sidadaun Timor-Oan ho idade 60 hela iha Comoro, Dili, nia hetan moras diagnóstikadu sindroma insufisiensia respiratoria aguda (SIRA), tanba hetan mós Covid-19 (Cycle Thresehold N2gene 30,5, E gene 28,6) iha HNGV, iha loron 29 fulan-Juñu maizomenus 14:00.

Matebian iha istoria moras kankru seluk hanesan, diabetes, kankru iha intestinu ne’ebé nakfera ona mós ba pulmaun.

Hafoin transfere ba Vera Cruz, matebian hetan tratamentu ba SIRA, tuir protokolu ne’ebé iha, maibé iha oras 17:00 matebian hakotu iss.

Tanba ne’e, familia kordena ona ho ekipa saúde atu hala’o funeral tuir protokolu ne’ebé adopta iha Timor-Leste.

Tanba ne’e, SIJK apela ba populasaun iha Timor-Leste laran tomak, nafatin regra respeita regras prevensaun no ijiéne individual ne’ebé Governu hatuur ona atu prevene moras Covid-19 da’et ba mai.

Regra sira ne’e hanesan ita hotu hatene ona mak, uza maskara, fase lima bebeik ho sabaun ka uza dezinfetante ruma, evita kose liman ba matan, inus no ibun,  evita halibur malu barak, bainhira kumprimenta malu la presiza kaer liman, bensa liman, rein malu ka hakuak malu no hamrik ka tur dook husi ema seluk minimu metro ida ho balun.

 

Asistente Editor: Saturnina da Costa

Rate this item
(0 votes)