Print this page

26 Outubru: Positivu Foun iha Dili Na’in Haat

By Saturnina da Costa Outubru 26, 2021 207
Corona Virus. Foto: Google. Corona Virus. Foto: Google.

DILI: Sentru Integradu Jestaun Krize (SIJK) relata iha loron 26 Outubru 2021, ekipa konjunta saúde rejista tan kazu positivu foun Covid-19 iha Dili hamutuk na’in haat (4).

Kordenador Forsa Tarefas ba Prevensaun no Mitigasaun iha Timor-Leste, Dr. Rui Maria de Araújo, hatete, númeru kazu detetadu foun nafatin reduzidu ka taxa pozitividade iha 1,3%. Total kazu rekuperadu hanesan ho kazu detetatu foun.

Aleinde, ema ne’ebé hala’o tratamentu ospitalizadu nafatin reduzidu no kazu óbitu laiha.

Nune’e, munisipiu 6 la iha ona kazu ativu no munisipiu 6 seluk ho RAEOA sei iha kazu esporádiku.

kobertura vasina kompletu (doze 2) iha nivel nasional, foin atinji 46,5%.

“Husi totál kazu detetadu foun ohin, iha kazu 2 ka 50% mak hatudu sintomas,”dehan nia iha komunikadu ne’ebé Online INDEPENDENTE asesu, tersa ne’e.

SIJK mós rejista kazu rekuperadu iha loron 26 Outubru 2021 iha na’in haat no kazu ativu hela na’in 52 iha Izolamentu.

Ho nune’e, kazu komulativu konfirmadu sura husi loron 21 fulan-Marsu tinan 2020 to’o 26 Outubru 2021 hamutuk 19.778.

Tuir dadus husi SIJK, total ema ne’ebé mate ho Covid-19 iha Timor-Leste hamutuk 121.

Entretantu, husi horiseik (25/10) mai ohin teste PCR ne'ebé Laboratóriu Nasionál Saúde halo iha Dili hamutuk 143, kompostu husi, Random Screening na’in 79, Viájen internasionál na’in 60 no Follow up iha kuarentena hamutuk na’in 4.

Teste PCR ne’ebé halo iha loron 25 Outubru 2021 iha munisípiu sira seluk, RAEOA no HNGV hamutuk 156.

Enkuantu, total teste PCR iha oras 24 ikus 299. Ida-ne’e hatudu taxa pozitividade 1,3%, iha semana kotuk, 19 outubru, taxa pozitividade iha 1,8 %. Iha Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk na’in 5, kompostu husi kazu grave na’in 1, kazu moderadu na’in 3 no kazu leve na’in 1.

Rate this item
(0 votes)
Last modified on Kuarta, 27 Outubru 2021 19:40