Print this page

24 Setembru: Mate ho Covid Na’in Rua , Positivu Foun Tun ba 44 Featured

By Saturnina da Costa Setembru 24, 2021 352
Koveiro sira prepara atu hiit mate tula ba kareta ambulansia, iha Izolamentu Lahane. Foto:INDEPENDENTE. Koveiro sira prepara atu hiit mate tula ba kareta ambulansia, iha Izolamentu Lahane. Foto:INDEPENDENTE.

DILI: Sala Situasaun Sentru Integradu Jestaun Krize (SIJK) ohin (24/09) relata, ekipa konjunta saúde rejista tan ema ne’ebé mate ho Covid-19 iha na’in rua (2) no positivu foun tun ba 44.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé rejista ohin, iha Kapital Dili numeru boot liu kompara ho Munisipiu sira seluk.

Husi kazu detetadu 44 ne’e, iha Dili kazu 20, Baukau kazu 2, Bobonaro kazu 4, Likisa kazu 2, Manatuto kazu 5, RAEOA kazu 7 no Vikeke kazu 4.

“Husi totál kazu detetadu foun ohin, kazu 21 ka 47,7% mak hatudu sintomas, kazu 9 ka 20% simu ona vasina kompletu no kazu 11 ka 25% simu ona vasina doze dahulu,”dehan nia iha komunikadu ne’ebé Online INDEPENDENTE asesu sesta ne’e.

Aleinde, SIJK mós rejista pasiente ne’ebé rekupera husi Covid-19 iha na’in 117 no kazu ativu ne’ebé baixa hela iha Izolamentu hamutuk 1. 108.

Enkuantu, total komulativu kazu konfirmadu sura husi loron 21 fulan-Marsu tinan 2020 to’o loron 24 fulan-Setembru tinan 2021 hamutuk 19.308.

Entretantu, ba kazu mate, Rui informa, sidadaun Timor-Oan mane na’in ida simu ona vasina AstraZeneca doze kompletu no ida seluk seidauk simu vasina.

Kazu dahuluk, mane ho idade 62, hela iha Lautem, vasina kompletu (AZ), iha loron 18 Setembru 2021, diagnóstikadu sindroma insufisiénsia respiratória aguda (SIRA) tanba Covid-19. Iha loron ne’e kedas hala’o tratamento iha Lahane. Nune’e, ihaa kinta (23/09) horiseik iha tuku 16.45 pasiente hakotu-iis.

“Familia kolabora ona ho ekipa saúde atu halo funeral tuir protokolu ne’ebé adopta iha Timor-Leste,”dehan Rui.

Kazu daruak, mane ho idade 83, hela iha Manatuto, seidauk vasina, iha 24 setembru 2021, diagnóstikadu sindroma insufisiénsia respiratória aguda (SIRA) tanba Covid-19. Ohin dadeer tuku 11.10 pasiente hakotu-iis iha Manatuto.

Tamba ne’e,  família rejeita hala’o funeral tuir protokolu ne’ebé adopta iha Timor-Leste.

Ho nune’e, total kazu ema ne’ebé mate ho Covid-19 iha TL hamutuk 111.

Rate this item
(0 votes)