Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu positivu foun iha Dili kontinua rejista as kompara ho Munisipiu sira seluk.

Husi kazu detetadu 25, iha Dili na’in 20, Bobonaro na’in 1, RAEOA na’in 3 no Vikeke na’in 1.

“Husi kazu detetadu ne’e, iha na’in 20 ka 80% hatudu sintomas, na’in 3 ka 12% simu ona vasina doze kompletu no na’in 1 ka 18% simu ona vasina doze dahuluk,”dehan nia iha komunikadu ne’ebé Online INDEPENDENTE asesu, segunda ne’e.

Aleinde, SIJK mós rejista pasiente ne’ebé rekupera husi moras Covid-19 iha na’in 127.

Ho nune’e, total komulativu kazu konfirmadu sura husi loron 21 fulan-Marsu tinan 2020 to’o loron 20 fulan-Setembru tinan 2021 hamutuk na’in 19.058.

Enkuantu, ba kazu mate Rui relata, sidadaun mane ida ho idade 45 hela iha Dili, seidauk simu vasina, diagnóstikadu ho Sindroma Insufisiénsia Respiratória Aguda (SIRA) tanba Covid-19 iha HNGV, iha loron 1 fulan-Setembru tinan 2021. Nune’e, pasiente hakotu is iha domingo (19/09) kalan iha Izolamentu Lahane tuku 20.58.

Entretantu, familia kolabora ho ekipa saúde hodi hala’o funeral tuir protokolu ne’ebé adopta iha Timor-Leste.