Print this page

20 Maiu, PR Fó Indultu Ba Prizoneiru Na’in 15 Featured

By Komunikadu imprena Maiu 19, 2021 603
Prezidente Repúblika, Francisco Guterres Lú Olo. Foto:Media PR. Prezidente Repúblika, Francisco Guterres Lú Olo. Foto:Media PR.

DILI:Prezidente Repúblika, Francisco Guterres Lú Olo, ezerse nia kompeténsia konstitusionál hodi fó indultu ba prizoneiru na’in 15 iha loron selebrasaun Restaurasaun Independénsia Timor-Leste ba dala-19.

Liu husi Dekretu Prezidente Repúblika ne’ebé publika iha Jornal Repúblika iha loron 19 fulan-Maiu tinan 2021, ho númeru 25/2021, 26/2021, 27/2021, 28/2021, 29/2021, 30/2021, prizoneiru na’in 6 hetan liberdade totál, na’in 4 hetan indultu parsial fulan 6 husi pena prizaun liu husi Dekretu Prezidente Repúblika númeru 31/2021, no na’in 5 hetan indultu parsial ho metade pena prizaun liu husi Dekretu Prezidente Repúblika númeru 32/2021.

Xefe Estadu uza nia kompeténsia eskluziva fó liberdade totál ba Francisco de Araújo, Thomas Freitas Martinho, Anacleto dos Santos, Mário Pereira da Costa, Adolfo Assunção de Jesus no Jaime Amaral Ximenes.

Indultu parsial ba prizioneirus hodi hamenus pena fulan 6 ba Elvis Hornai da Cruz, José Fernandes, Renato Hornai da Cruz no Tiago Soares Almeida.

Ba prizoneirus Arminda Soares, Geremias Sequeira Andrade, Henrique dos Santos, Ivo Soares no José dos Santos hetan Indultu parsial ho metade pena.

Dekretu Prezidente sira ne’e sei tama iha vigor iha loron 20 fulan-Maiu tinan 2021.

Tuir artigu 85, alinea 1 husi Konstituisaun Repúblika hateten katak Prezidente Repúblika de’it mak bele fó indultu ka hamenus kastigu, depois rona Governu ne’ebé konjuga ho artigu 3 no 4 Lei númeru 5/2016, loron 25 fulan-Maiu.

Definisaun ba indultu no hamenus kastigu haktuir ona iha Kódigu Penál ne’ebé aprova ho Dekretu-Lei númeru 19/2009 no Lei númeru 15/2016 mak regula kondisaun no prosedimentu atu fó indultu ka hamenus kastigu. Prezidente Repúblika halo nia kompeténsia tuir de’it lei haruka.

Tanba ne’e atu fó indultu no komutasaun pena ba prizoneiru sira nu’udar kompeténsia eskluziva Prezidente Repúblika nia tuir artigu 85 Konstituisaun no Kódigu Penál no Lei númeru 5/2016. Ba krime organizadu, krime transnasionais, terorismu, tráfiku umanu, korupsaun ativa maski kumpri ona um tersu pena maibé lei bandu atu fó indultu.

Nune’e, ba krime sira ne’ebé la grave, hafoin kumpri um tersu pena, Prezidente Repúblika bele fó indultu ho razaun umanitaria nian.

 

Asistente Editor: Saturnina da Costa

Rate this item
(0 votes)