Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé relata ohin, iha Dili 152, Baucau 35, Ainaro 20, Manufahi 12, Bobonaro 5, Covalima 13, Ermera 10, RAEOA 7, no Vikeke 7. “Kazu detetadu foun ohin, iha na’in 89 ka 33,3% mak sintomátiku,”dehan nia iha komunikadu, sesta ne’e.
Ho nune’e, pasiente rekuperadu loron ohin hamutuk 113 no kazu ativu hamutuk 2.882. Totál Komulativu kazu konfirmadu sura husi loron 21 fulan-Marsu tinan 2020 to’o loron 20 fulan-Agostus tinan 2021 hamutuk 13.700.
Entretantu, sidadaun feto ida ho idade tinan 50, ne’ebé ohin mate hanesan Timor-oan, hela iha Dili, hafoin moras iha loron 7 fulan-Agostus tinan 2021, ho diagnostika iha Óspital Nasional Guido Valadares (HNGV), ho Covid-19 (PCR positivu ho CT E gene 16,7, N gene 19,1).
Matebian sofre moras mós kankru mama direita ho metástase ba pulmaun no iha mós anemia severa. Iha fatin Izolamentu Vera Crus hala’o tratamentu tuir protokolu ne’ebé iha, maibé matebian hakotu-iis horseik (19/08) lokraik iha oras tuku 16:40 tanba xoke séptiku no falénsia orgaun lubuk ida (multiple orgaun failure).
Nune’e, rezultadu PCR hafoin iss-kotu hatudu CT E gene 33. Tanba ne’e, familia kordena ona ho ekipa saúde atu hala’o funeral tuir protokolu ne’ebé adopta iha Timor-Leste. Totál komulativu óbitu iha Timor-Leste hamutuk na’in 42.
Entretantu, husi horiseik (19/08) mai ohin teste PCR ne'ebé Laboratóriu Nasionál Saúde halo hamutuk 960 kompostu husi, vijilansia sentinela na’in 101, contact tracing 408, random screening 36, viájen sai husi serka sanitária husi Dili 335, viájen internasionál laiha no follow up iha kuarentena na’in 30.
Aleinde, teste PCR ne’ebé halo horiseik (19/08) Munisipiu sira seluk, RAEOA no HNGV hamutuk 362 no Izolamentu Vera Cruz ohin halo tratamentu ba kazu detetadu hamutuk na'in 57, iha area obstetrisia na’in 9 kategoria leve hotu, medisina interna na’in 37 kompostu husi na’in 15 kategoria grave, 1 uza ventilador, 13 kategoria moderadu no na’in 9 kategoria leve. Aleinde, iha sirurjia na’in 8 kategoria leve hotu no pediatria na’in 3 kategoria leve.
Tanba ne’e, SIJK nafatin pela ba populasaun sira nafatin regra prevensaun no ijiéne individuál ne’ebé Governu hatuur ona, uza maskara, fase liman ho sabaun ka uza dezinfekta ruma, evita kose liman ba matan, inus no ibun no mós labele halibur malu barak.
Asistente Editor: Saturnina da Costa