Print this page

13 Setembru: Positivu Foun Tun ba 82, Mate Na’in Ida

By Saturnina da Costa Setembru 13, 2021 303
Mediku ne'ebe halo tratamentu ba pasiente Covid-19 iha Izolamentu. Foto:INDEPENDENTE. Mediku ne'ebe halo tratamentu ba pasiente Covid-19 iha Izolamentu. Foto:INDEPENDENTE.

DILI: Sala Situasaun Sentru Integradu ba Jestaun Krize (SIJK) ohin (13/09) relata, ekipa konjunta saúde rejista tan kazu positivu foun Covid-19 na’in 82, kompara ho loron horseik (12/09) iha na’in 133.

Nune’e, ema ne’ebé mate ho Covid-19 iha Izolamentu na’in ida (1)

Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo informa, Munisipiu Dili kontinua rejista númeru kazu boot liu kompara ho Munisipiu sira seluk.

Husi total kazu detetadu 82, iha Dili deteta kazu 44, Bobonaro kazu 9, Baukau kazu 11, Ainaro kazu 2, RAEOA kazu 5, Ermera kazu 1, Manufahi kazu 7 no Vikeke kazu 3.

“Husi kazu detetadu ne’e, na’in 47 ka 57,3% hatudu sintomas, na’in 18 ka 22% simu ona vasina kompletu no na’in 9 ka 11% simu ona vasina doze dahuluk,”dehan nia iha komunikadu ne’ebé Online INDEPENDENTE asesu segunda ne’e.

Maske deteta kazu pozitivu, maibé SIJK mós rejista kazu rekuperadu ne’ebé barak liu kazu pozitivu foun. Iha loron 13 fulan-Setembru ema na’in 174 mak rekupera no kazu ativu iha Izolamentu hamutuk 3.013.

Total komulativu kazu sura husi loron 21 fulan-Marsu tinan 2020 to’o loron 13 fulan-Setembru tinan 2021 hamutuk 18.597.

Ba kazu mate, Rui informa, matebian na’in ida ne’e hanesan sidadaun Timor-Oan no seidauk simu vasina.

“Mane ho idade 65, hela iha Dili, seidauk simu vasina, diagnostikadu Covid-19 ho AVC emorájiku iha HNGV ohin madrugada. Nune’e iha tuku 01.19 pasiente hakotu-iis,”tenik nia.

Enkuantu, familia matebian deside lori mate isin ba uma.

Tuir dadus husi SIJK, total ema ne’ebé mate ho Covid-19 hamutuk na’in 96.

Entretantu, husi horseik (12/09) mai ohin teste PCR ne’ebé Laboratoriu Nasional Saúde halo iha Dili hamutuk na’in 216 kompostu husi Vijilansia sentinela na’in 19, Contact tracing na’in 24, Random screening  na’in 31, Viajen sai husi serka sanitaria Dili na’in 37, Viajen internasional na’in 58 no Follow up iha kuarentena na’in 42.

Teste PCR ne’ebé halo iha Munisipiu sira seluk, RAEOA no HNGV hamutuk na’in 249. Iha loron 13 fulan-Setembru tinan 2021, Izolamentu Vera Crus, Lahane, HNGV no fatin seluk iha teritoriu laran tomak halo tratamentu hospitalizadu ba kazu detetadu hamutuk na’in 81 kompostu husi kazu grave na’in 12, moderadu na’in 45 no kazu leve na’in 24.

Rate this item
(0 votes)