Print this page

10 Outubru: Positivu Foun Covid-19 iha 12, Kazu Ativu 222 Featured

By Outubru 10, 2021 332
Rejultadu teste PCR hatudu positivu Covid-19. Foto:Dok. Rejultadu teste PCR hatudu positivu Covid-19. Foto:Dok.

DILI: Sala Situasaun Sentru Integradu Jestaun Krize (SIJK) ohin (10/10) relata, ekipa konjunta saúde rejista tan kazu positivu foun Covid-19 iha na’in 12, nune’e kazu ativu ne’ebé iha Izolamentu hamutuk na’in 222.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatetet, kazu foun ne’ebé relata ohin iha Dili na’in 9, Baukau na’in 1, Kovalima na’in 2 no RAEOA na’in 1.

“Husi totál kazu detetadu foun ohin, kazu 8 ka 66,6% mak hatudu sintomas no kazu 3 ka 25% simu ona vasina kompletu,” dehan nia iha komunikadu ne’ebé Online INDEPENDENTE asesu, domingo ne’e.

Aleinde, SIJK mós rejista pasiente ne’ebé rekupera husi moras Covid-19 iha na’in 37.

Totál komulativu kazu konfirmadu sura husi loron 21 fulan-Marsu tinan 2020 to’o loron 10 fulan-Outubru tinan 2021 hamutuk 19.673.

Entretantu, husi horiseik (09/10) mai ohin teste ne'ebé Laboratóriu Nasionál Saúde halo iha Dili hamutuk 51, kompostu husi, Contact tracing na’in 4, Random Screening na’in 7, Viajen internasional na’in 25 no follow up iha kuarentena na’in 14.

Enkuantu, teste PCR ne’ebé halo horiseik iha Munisípiu sira seluk, RAEOA no HNGV hamutuk 90.

Ho nune’e, Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk na’in 22, kompostu husi kazu grave na’in 4, kazu moderadu na’in 5 no kazu leve na’in 13.

Rate this item
(0 votes)
Saturnina da Costa

Jornalista Jornal Independente

https://independente.tl

Latest from Saturnina da Costa