Print this page
Teste PCR. Foto: INDEPENDENTE. Teste PCR. Foto: INDEPENDENTE.

06 Setembru: Numeru Positivu Covid-19 Tun ba 80, Mate Na’in 2

DILI: Sala Situasaun Sentru Integradu Jestaun Krize (SIJK) ohin (06/09) relata, ekipa konjunta saúde deteta tan numeru positivu Covid-19 iha teritoriu laran tomak hamutuk na’in 80 no mate na’in rua (2), iha Sala Izolamentu Lahane no Óspital Referensia Maliana.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, numeru kazu detetadu foun ohin, iha Kapital Dili na’in 56, Baucau  na’in 12, RAEOA na’in 10 no Munisipiu Bobonaro iha kazu na’in 2.

“Husi kazu detetadu foun ohin, iha kazu 22 (27,5%) mak hatudu sintomas no sira ne’ebé simu ona vasina kompletu haamutuk na’in 14 (18%) no na’in 12 (15%) foin hetan vasina doze dahuluk,”dehan nia iha komunikadu, ne’ebé Online INDEPENDENTE asesu iha segunda ne’e.

Ho nune’e, SIJK mós ohin rejista pasiente rekuperadu hamutuk na’in 130 no kazu ativu iha Sala Izolamentu hamutuk 4.132.

Total komulativu kazu konfirmadu ne’ebé sura husi loron 21 fulan-Marsu tinan 2020 to’o loron 6 fulan-Setembru tinan 2021 hamutuk 17.689.

Rui esplika, ohin SIJK rejista sidadaun Timor-Oan feto na’in rua mate ho Covid-19. Matebian na’in rua ne’e seidauk hetan vasina.

“Matebian feto dahuluk ho idade 76, hela iha Munisipiu Maliana, matebian refere seidauk simu vasina. iha loron 31 fulan-Agosto tinan 2021 ho diagnóstikadu iha Óspital Referensia Maliana, ho sindroma insufisiénisa respiratoria aguda (SIRA) tanba Covid-19. Enkuantu matebian sofre mós moras diabetes no iha istoria tratamentu tuberkuloze pulmonar, istoria AVC iskémiku ho hipertensaun. Nune’e matebian hakotu-iis horseik (05/09) tuku 11:00 oras Timor-Leste,”tenik nia.

Aleinde, matebian feto daruak ho idade 64 hela iha Dili no seidauk vasina. iha loron 25 fulan-Agosto tinan 2021 diagnóstikadu iha HNGV ho sindroma insufisiénisa respiratoria aguda (SIRA) tanba Covid-19. Iha loron ne’e kedas matebian hala’o tratamentu iha Sala Izolamentu Lahane. Nune’e, matebian hakotu-iis ohin dader tuku 11:55 OTL.

Enkuantu, familia husi matebian na’in rua ne’e, kordena ona ho ekipa konjunta saúde hodi hala’o funeral tuir protokolu ne’ebé adopta iha Timor-Leste.

Entretantu, tuir dadus husi SIJK total ema ne’ebé mate ho Covid-19 iha Timor-Leste hamutuk na’in 82.

Husi horseik (05/09) mai ohin, teste PCR ne’ebé Laboratóriu Nasional Saúde halo iha Dili hamutuk na’in 275, kompostu husi Vijilamsia sentinela na’in 20, Contact tracing na’in 31, Random Screening na’in 54, Viajen sai husi serka sanitaria husi Munisipiu Dili na’in 50, Viajen internasional na’in 1 no Follow up iha kuarentena hamutuk na’in 119.

Total PCR ne’ebé halo horseik (06/09) iha Munisipiu sira seluk, RAEOA no HNGV hamutuk na’in 287.

Ohin, iha Izolamentu Vera Crus, Lahane, HNGV no fatin seluk iha teritoriu laran tomak, hala’o tratamentu hospitalizadu ba kazu detetadu positivu hamutuk 91, kompostu husi kazu grave na’in 11, kazu moderadu na’in 60 no kazu leve na’in 20.

Tanba ne’e, SIJK nafatin apela ba populasaun sira atu kolabora no kontribui atu virus SARS-CoV-2, inklui variante Delta labele hada’et ba ema barak. Nune’e nafatin hela iha uma bainhira la presiza atu sai.

Read 279 times
Rate this item
(0 votes)