Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, númeru kazu detetadu foun ohin reduz kompara ho horiseik (01/10), maske kazu rekuperadu menus.
Nune’e, iha númeru mate 1 (ida). Husi 93,2% (110/118) ema ne’ebé mate ho Covid-1 seiduak vasina kompletu.
Enkuantu, númeru ema ne’ebé hala’o tratamentu ospitalizadu reduz kompara ho horiseik
Ho nune’e, total positivu foun ohin hamutuk 28, aleinde husi Baukau iha kazu 20, iha Dili mós iha kazu 7 no RAEOA iha kazu 1.
“Husi totál kazu detetadu foun ohin, kazu 4 ka 14,2% mak hatudu sintomátiku, kazu 10 ka 36% simu ona vasina doze kompletu no kazu 3 ka11% simu ona vasina doze dahuluk,"dehan nia iha komunikadu ne'ebe Online INDEPENDENTE asesu, sabado ne'e.
Aleinde, SIJK mós rejista kazu rekuperadu hamutuk na’in 21 no kazu ativu ne’ebé baixa hela iha Izolamentu hamutuk 750.
Totál komulativu kazu konfirmadu sura husi loron 21 fulan-Marsu tinan 2020 to’o loron 02 fulan-Outubru tinan 2021 hamutuk 19.563.
Entretantu, ba kazu mate, Rui relata, sidadaun Timor-oan feto na’in ida ho idade 56 hela iha RAEOA, simu ona vasina doze dahuluk.
Nune’e, iha loron 27 fulan-Setembru 2021, diagnóstikadu sindroma insufisiénsia respiratória aguda (SIRA) tanba Covid-19. Iha loron ne’e kedas hala’o tratamento iha fatin izolamentu iha RAEOA. Matebian iha mós problema diabetes ho anemia grave. Enkuantu, iha sesta (01/10) loraik tuku 16:00 pasiente hakotu-iis.
Tanba ne’e, familia kolabora ho ekipa saúde, hodi hala’o funeral tuir protokolu ne’ebé adopta iha Timor-Leste.
Tuir dadus, total ema ne’ebé mate ho Covid-19 iha Timor-Leste hamutuk na’in 118.
