Print this page

01 Setembru: Positivu Covid-19 iha 232, Mate Na’in 5

By Setembru 01, 2021 516
Rezultadu teste PCR hatudu positivu. Foto: Independente. Rezultadu teste PCR hatudu positivu. Foto: Independente.

DILI: Sala Situasaun Sentru Integradu Jestaun Krize (SIJK) ohin (01/09) relata, ekipa konjunta saúde rejista tan kazu foun hamutuk na’in 232. Enkuantu ema ne’ebé mate ho Covid-19 hamutuk na’in 5.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé relata ohin iha Kapital Dili 169, Covalima 14, Baucau 12, Lautem 12, Vikeke 8, Aileu 2, Bobonaro 6, Ermera 1, Manatuto 4 no RAEOA 4.

“Husi totál kazu detetadu foun ohin, iha kazu 87 (37,5%) mak hatudu sintomátiku, sira ne’ebé simu ona vasina kompletu iha na’in 88 (38%) no simu vasina doze dahuluk iha na’in 26 (11%),”dehan nia iha komunikadu ne’ebé Online INDEPENDENTE asesu, kuarta ne’e.

Aleinde, ohin SIJK mós rejista pasiente ne’ebé rekupera husi moras Covid-19 hamutuk na’in 247 no kazu ativu ne’ebé baixa hela Sala Izolamentu sira hamutuk na’in 4.480.

Nune’e, totál komulativu kazu konfirmadu sura husi loron 21 fulan-Marsu tinan 2020 to’o loron 1 fulan-Setembru tinan 2021 hamutuk 16.914.

Rui relata, kazu mate ne’ebé relata ohin iha sidadaun Timor-Oan na’in lima ho identidade mane na’in tolu no feto na’in rua, sira ne’e hotu seidauk simu vasina.

“Matebian mane dahuluk ho idade 72, hela iha Díli no seidauk vasina, iha loron 30 fulan-Agostu 2021, diagnóstikadu iha HNGV ho Covid-19 no Acidente Vascular Cerebral (AVC) hemorájiku. Matebian hakotu-iis iha tersa kalan (31/08), tuku 23:30 oras Timor-Leste,”tenik nia.

Mane daruak ho idade 63, hela iha Díli no seidauk vasina, iha loron 29 fulan-Agostu 2021 diagnóstikadu iha HNGV ho sindroma insufisiénsia respiratória aguda (SIRA) tanba Covid-19. Matebian is-kotu ohin, iha tuku 12:55 OTL.

Mane datoluk ho idade 72, hela iha Ainaro, matebian refere seidauk simu vasina, iha loron 30 fulan-aAostu 2021 diagnóstikadu iha Ainaro ho sindroma insufisiénsia respiratória aguda (SIRA) tanba Covid-19. Matebian is-kotu ohin, tuku 06:00, molok atu evakua ba ospitál referénsia Maubisse.

Entretantu, matebian feto dahuluk ho idade 59, hela iha Díli, seidauk vasina, iha loron 31 fulan-Agostu 2021 diagnóstikadu iha HNGV ho Covid-19 no Acidente Vascular Cerebral (AVC) iskémiku. Matebian is-kotu ohin tuku 10:00 OTL.

Feto daruak ho idade 49, hela iha Covalima, seidauk vasina, iha loron 29 fulan-Agostu 2021 diagnóstikadu iha Covalima sindroma insufisiénsia respiratória aguda (SIRA) tanba Covid-19. Iha loron ne’e kedas, matebian evakua liuhusi ambulância aeria mai Izolamentu Vera Cruz. Matebian is-kotu ohin tuku 19:15 OTL.

Nune’e, família husi matebian na’in lima ne’e kordena ona ho ekipa saúde atu hala’o funeral tuir protokolu ne’ebé adopta iha Timor-Leste.

Tuir dadus total ema ne’ebé mate ho Covid-19 iha Timor-Leste hamutuk na’in 72.

Ho nune’e, husi horiseik (31/08) mai ohin teste PCR ne'ebé Laboratóriu Nasionál Saúde halo hamutuk 686 ne’ebé kompostu husi, Vijilánsia sentinela na’in  48, Contact tracing 264, Random Screening 126, Viájen sai husi serka sanitária husi Dili 155, Viájen internasionál 24 no Follow up iha kuarentena 69.

Teste PCR ne’ebé halo horiseik (31/08) iha Munisipiu sira seluk, RAEOA no HNGV hamutuk 377. Ohin, iha Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk 116.

Husi numeru ne’e na’in 16 grave (nain 4 uza ventilador, nain 1 uza CPAP-Continuous Positive Airway Pressure-11 uza oksijéniu), na’in 64 moderadu no leve na’in 36.

Tanba ne’e, SIJK husu kompriensaun no pasiénsia populasaun iha Timor-Leste laran tomak, atu kolabora no kontribui atu vírus SARS-CoV-2, inkui variante Delta, labele hada’et ba ema barak liután, no favor hela iha uma, bainhira lapresiza atu sai.

 

Asistente Editor: Saturnina da Costa

Rate this item
(0 votes)
Saturnina da Costa

Jornalista Jornal Independente

https://independente.tl

Latest from Saturnina da Costa