Polisia Kaer Na’in 2 Sikat Tudik iha Kanotak Featured

By Tome Amado Outubru 18, 2018 6281
Ilutrusaun Lori tudik. Foto:  okezone .com Ilutrusaun Lori tudik. Foto: okezone .com

DILI: Komando Polisia Eskuadra Na’i Feto, iha Segunda (15/10) maizumenus tuku 23:00 kaptura mane na’in rua ho inisial DA no EM iha area Kampu Demokrasia tanba lori tudik.

Aleinde lori tudik, suspeitu na’in rua ne’ebé sa’e motor marka Revo kór metan ne’e mós kontra lei tranzitu tanba la monta xapa matrikula.

Komandante daruak PNTL Munisipiu Dili, Superintendenti Asistente Euclides Belo informa, polisia kaptura tanba suspeitu sira kontra lei númeru 5/2017, arma branka nian, no mós kontra lei tranzitu.

Hafoin kaptura, polisia detein suspeitu na’in rua iha sela polisia Eskuadra Na’i Feto hodi submete ba prosesu identifikasaun durante oras 12 nia laran.

“Suspeitu DA no EM agora detein hela iha sela komando Eskuadra Na’i Feto hodi hein prosesu, depois mak sei lori mai Komando Kaikoli atu submete ba prosesu investigasaun inklui kumpre oras 72,” dehan Euclides iha Komando PNTL Dili, Kaikoli, Tersa (16/10).

Kapturasaun ba suspeitu na’in rua ne’e, nia dehan, hala’o liu husi operasaun ne’ebé Komando orienta relasiona ho volume konfrontu ne’ebé hahú sa’e iha semana ikus ne’e.

Nia informa suspeitu na’in rua ne’e mai husi diresaun sentru Kampu Demokrasia nian atu ba Largo Lesidere. Bainhira foti kurva hodi hili dirasaun sede Partidu CNRT nian, sira hakfodak tan iha Eskola númeru 1 Nularan nia oin, polisia hala’o hela check point. Suspeitu DA ne’ebé kondus motor tenta atu halai fila maibé Forsa Rezerva taka dalan husi kotuk.

“Ami-nia ekipa tahan sira tanba motorista atu halai fila. Membru sira aperta kedas sira na’in rua  hodi halo pasa revista ba sira-nia isin lolon. Ami hetan duni tudik ida ne’ebé sikat hela iha suspeitu EM nia kanotak parte loos,” dehan nia.

Haree ba faktu ne’ebé iha, Euclidis dehan, polisia konsidera suspeitu DA no EM iha planu tanba preparadu ho tudik atu hala’o asaun krime ba ema seluk.

Rate this item
(0 votes)

Independente Digital TV