Iha Domingu (03/12) tuku 01:00 madrugada, AG halo tentativa omesidu ba nia primu Agustinho. Kazu ne’e akontese iha area Delta III Komoro.

Komando Polisiaa Nasionál Timor Leste (PNTL) Munisipiu Dili informa, halo ona kapturasaun ba suspeitu ho inisial AG.

Komandante daruak PNTL Dili, Supertintendente Asistente Eucelides Belo hatete, hafoin kazu tentativa omesidu ne’e akontese, iha Domingu dader membru Polisiaa Eskuadra Dom Aleixo Komoro kaptura kedan suspeitu no lori ba Komando Munisipiu Dili hodi halo prosesu invetigasaun.

Tuir Eucelides, daudauk ne’e suspeitu detein iha sela Komando Munisipiu Dili hodi hein prosesu primeiru interogatoriu iha Tribunal Distrital Dili (TDD).

Tuir kronolojia, akontesimentu ne’e mosu bainhira suspeitu ho vitima hemu tua hamutuk.

“Tanba lanu ona koalia la kona malu suspeitu nervozu foti katana ne’ebé tau besik hela iha ninia sorin ta’a kedas vitima Agustinho Soares,” informa Eucelides.

Vitima dadaun hetan ona tratamentu iha Ospital Nasional Guido Valadares (HNGV). Vitima iha loron ne’e kedas hetan lisensa husi mediku sira atu fila ba uma.