Lakohi ba Deve Osan sai Razaun Laen Baku Feen Featured

By Martinha Gusmao Janeiru 29, 2019 5419
Ilustrasaun Deve Osan. FOTO: nextavenue.org Ilustrasaun Deve Osan. FOTO: nextavenue.org

DILI: Laen ida ho inisial MB halo agresaun fiziku hasoru nia feen ho inisial CBA tanba nia feen lakohi ba deve osan. Razaun husi MB obriga feto ne’ebé nia hola sai nia feen dezde tinan 2002 no iha ona oan na’in tolu ne’e ba deve osan atu MB bele lori osan refere hodi ba futu manu.

Tuir akuzasun husi Ministériu Públiku iha 20 Setembru 2013 tuku 8:00 Otl iha Bekora, Dili, arguidu haruka lezada atu ba buka hodi deve osan fó ba arguidu ba futu manu. Arguidu dehan, bainhira arguidu manan nia sei sosa roupa foun ba loron boot nian.

“Arguidu mós ameasa lezada katak ba servisu la lori osan fó ba arguidu mak arguidu sei baku rahun lezada nia ulun,” deklara MP iha ninia akuzasaun.

Iha 28 Outubru 2013, MP dehan tan, arguidu ameasa lezada tanba arguidu nia inan-aman sira lori osan $100 ba lezada nia avo ne’ebé mate. Ho ameasa ne’e lezada tauk hodi halai ba Likisa.

Iha 2 Fevereiru 2014 tuku 16:00 loraik Otl lezada hamutuk ho nia prima sira atu ba Fatuhada maibé arguidu hetan lezada iha kurzamentu Motael, nune’e arguidu rasta lezada ba rai hodi tuku dala-barak iha lezada nia oin. Asaun ne’e halo lezada nia ibun nakles. La to’o ida ne’e, arguidu kontinua lori batako hodi tuku dala ida iha lezada nia kanoruk.

Entretantu, tuir sasin husi AA nu’udar lezada nia aman, arguidu sempre baku lezada. Bainhira arguidu ba joga ka futu manu no lakon, lezada sempre lori todan.

“Ida ne’e mak tuir ha’u-nia hatene. Problema seluk ha’u la hatene maibé kona-ba futu manu, joga, ida mak ha’u hatene,” dehan sasin ne’e.

Tribunál adia julgamentu ba 31 Janeiru 2019 tuku 9:00 dader hodi rona alegasaun final.

Rate this item
(0 votes)

Independente Digital TV