DILI: Apoiante sira ne’ebé uza atributu kandidatura Prezidente Repúblika, Francisco Guterres ‘Lu-Olo’ estraga uma komunidade Rai-Kotu, Aldeia Terra Santa, iha loron primeiru kampaña eleisaun Prezidensiál, Sesta (3/3).

Insidente ne’e rezulta uma 36 hetan estragu no ema na’in rua kanek. Joven na’in rua ne’ebé kanek identifikadu ho naran Virgílio de Araújo (18) kanek iha rentós no Roberto Carlos das Neves (14) kanek iha parte ain-tur.

Xefe Aldeia Terra Santa, Esperança de Jesus hateten, apoiante sira ne’ebé uza atributu kandidatura Lu-Olo halo agresaun fízika no anarkizmu ba komunidade sira hodi estraga uma ho sasán.

“Ami triste tebes ho asaun ne’ebé militante sira halo mai ami,” dehan nia, liu husi konferénsia imprensa, iha Aldeia Terra Santa, Sábadu (4/3).

Nia husu, Kandidatu Lu-Olo tenke responsabiliza ba aktu ne’ebé militante sira halo ba komunidade sira hodi rezulta sobu no estragu komunidade sira nia uma ho patrimóniu seluk.

Xefe Aldeia ne’e afirma, kauza ba akontesimentu ne’e tanba mobilizasaun masa husi Dili ba Gleno hodi hamosu konfrontasaun ba komunidade no vítima na’in rua maka hetan kanek ho agresaun ne’e.

Nia dehan, seguransa PNTL sira tenke hala’o asaun preventiva ba movimentu kampaña sira atu labele akontese konflitu.

Tanba ne’e, nia apela ba komunidade ho joven sira iha Aldeia Terra Santa atu labele tuur iha lurón ibun hodi provoka situasaun, no estrada ne’e públiku ne’ebé ema hotu iha diretu atu halo movimentu ba-mai.

Iha fatin hanesan, Xefe Suku Komoro, Eurico de Jesus dehan, daudaun ne’e prosesu kampaña eleisaun prezidensiál la'o hela. Tanba ne’e, kandidatu sira tenke halo komunikasaun ne’ebé efikás ho autoridade lokál sira hodi toma atensaun ba populasaun tomak.

Xefe Suku haktuir, komunidade nia uma 36 maka estragu, iha mós karreta estadu nian husi Ministériu Finansas (MF) ida, karreta Ministériu Solidariedade Sosiál (MSS) ida, inklui patrimóniu privadu maka hetan estragu.

Nia dehan, koordenadór partidu sira tenke fó orientasaun ba militante sira atu labele kria konflitu rezulta povu maka sai vítima.

Tanba ne’e, Xefe Suku husu ba órgaun ComissãoNacional Eleições (CNE) ho Sekretariadu Tékniku Administrasaun Eleitorál (STAE) tenke haree ba kazu ne’e tanba tempu kampaña ne’ebé atitude sira ne’e mai husi militante sira nian.

Iha Fatin hanesan Koordenadór Partidu Demokrátiku (PD) Suku Komoro, Manuel Ximenes da Costa hateten, iha partidu boot rua maka mai sobu komunidade sira nia uma ho panfletu kandidatura António ‘Kalohan’ nian iha estrada ibun.

Atitude sira ne’ebé militante partidu rua ne’e hatudu iha fatin públiku ne’e oinsá ho lider sira partidu rua ne’e nian, tanba ne’e tenke responsabiliza ba atitude sira ne’ebé membru sira halo ba komunidade sira nia uma.

Militante Partidu FRETILIN no apoiante Kandidatu Lu-Olo, Alexandre Belo bainhira dada-lia ho jornalista INDEPEDENTE hateten, molok sira arranka ba Gleno, joven sira husi apoiante Kalohan nian hamriik iha ofisina Rai-kotu nian halo ona provokasaun.

Ne’e duni, bainhira kampaña remata militante sira fila, iha Rai-kotu motór haat rua ne’ebé halai uluk ho bandeira FRETILIN hetan soke husi joven sira husi kandidatura seluk monu no sama tan bandeira FRETILIN nian.

Haree ba ida ne’e, militante FRETILIN hein malu hamutuk hodi futu lia ba malu hodi sobu uma no estagus sasán komunidade nian lubuk ida.

BAUKAU: Prezidente Repúblika (PR), Taur Matan Ruak deklara publikamente ba públiku katak nia partidu maka Partidu Libertasaun Populár (PLP), tan ne’e prontu kompete ho partidu CNRT no FRETILIN iha eleisaun parlamentár 2017.

DILI: Igreja Dioseze Dili liu husi Komisaun Justisa no Paz realiza jornada pás ho tema “Muda O-nia fuan, muda mós Timor”. Eventu ne’e hala’o relasiona ho loron eleisaun prezidensiál no parlamentár iha 2017 nia laran.Bispu Dioseze Dili, Don Virgílio do Carmo da Silva hateten, jornada ba dame ne’e hahú ona iha 2006 ho naran movimentu asaun laiha violénsia. Nune’e, iha 2012 hamutuk Komisaun Justisa no Paz hala'o jornada da pás husi Ai-Mutin too Lesidere.

“Espíritu ida ne’e mak ohin lori ita hotu atu halibur hamutuk hodi hametin liután kompromisu ida ne’e muda O-nia fuan muda Timor, ita bele husu ba ita nia aan tanba saida mak ita preokupa ho dame,” dehan Bispu Virgílio, iha Largo Lesidere, Kinta (2/3).

Bispu dehan, mai hamutuk iha fatin ne’e tanba timoroan hotu hakarak atu pás mak ukun ho fuan tanba hakarak moris iha hakmatek nia laran. Tanba povu ida ne’e foin ukun rasik-aan lakohi atu iha tan violénsia.

“Finalidade ba halibur malu ida ohin atu kompromisu liu ita nia rai atu halo tan istória liu husi selebrasaun festa demokrasia mak ita sei hili ita nia na'i ulun sira atu kaer nasaun ne’e nia destinu no povu nia futuru,” tenik nia.