Sábadu, 23 Outubru 2021 | Login
×

Erro

An error occured during data fetch from google.com: Error calling GET https://www.googleapis.com/analytics/v3/data/ga?ids=ga%3A138150919&start-date=2017-01-15&end-date=2021-10-21&metrics=ga%3Avisits&dimensions=ga%3Ayear&start-index=1&max-results=1000: (403) Quota Error: profileId ga:138150919 has exceeded the daily request limit.
Ekipa Nasional Futebol Timor-Leste Ekipa Nasional Futebol Timor-Leste

Deskonfia Máfiozu iha FFTL Featured

DILI: Estrutura Federasaun Futeból Timor-Leste (FFTL) balun, deskonfia kria klube ho naran Dili United hodi hetan lukru husi prosesu transferénsia jogadór husi Timor-Leste ba estranjeiru.

Tuir pájina indonesiabola.net, jogadór ne’ebé naturalizadu hodi defende selesaun nasionál hamutuk 12, mak hanesan Ramon de Lima Saro, Paulo Helber Rosa Ribeiro, uluk joga iha klube Bhayangkara FC, Diogo Santos Rangel, uluk joga iha Persegres no Sriwijaya FC, Rodrigo Sousa Silva, Patrick Fabiano Alves Nobrega Luz, Paulo Cesar da Silva Martins, Jairo Pinheiro Palmeira Neto, Felipe Bertoldo do Santos atuál jogadór klube Mitra Kukar, Junior Aparecido Guimaro de Souza, Jaime Celestino Dias Braganca, Heberty Fernandes de Andrade no Thiago dos Santos Cunha.

Husi jogadór ne’ebé naturalizadu, iha jogadór Brazileiru na’in tolu-haat mak uluk ninia estatutu sai hanesan jogador klube Dili United.

Iha website www.zerozero.pt, jogadór Brazileiru ne’ebé joga iha klube refere iha períodu 2012 - 2014, mak jogadór Ramon Saro, Paulo Helber Ribeiro, Diogo Santos Rangel no Alan Leandro.

Baihira peskiza kona-ba estrutura klube Dili United, iha deskrisaun ba kada pozisaun, maibé tau de’it trasu.

Pájina wikipedia, la’ós website ne’ebé kredivel, maibé pájina ne’e sempre atualiza informasaun kona -ba totál jogu ka caps ne’ebé jogadór ida realiza iha klube ida.

Jogadór hirak ne’ebé ninia estatutu hanesan jogadór Dili United, ninia caps ne’e tau de’it pontu interrogasaun, maibé ba klube ne’e sai destinu transferénsia tau totál caps. Eseptu jogadór Paulo Helber, ne’ebé nia realiza jogu dala 12 ho klube Dili United ho golu tolu.

Maibé, husi estatutu jogadór Paulo Helber, iha senáriu ida ne’ebé hamosu dúvida ba públiku, tanba durante ne’e klube Dili United la partisipa iha jogu ofisial ne’ebé realiza iha Timor-Leste.

Husi pájina wikipedia verifika katak, Ramon Saro transfere ba klube Porto Taibessi, depois ba klube Baharain FC, Paulo Helber ba klube Brasileiru Monte Azul, Alan Leandro no ba klubu Indonéziu Sriwijaya FC no ikus liu mak Diego Rangel ba klube hanesan mak Sriwijaya FC.

Maibé, husi peskiza ne’ebé halo iha pájina bola, sindo news, kompas no detik sport, la deteta kustu husi transferénsia ba kada jogadór. Nune’e bele komprova katak, buat balun ne’ebé subar iha prosesu transferénsia jogadór Brazileiru no klube Dili United.

Portavós Amante Futeból, José Luís Oliveira la rekoñese legalidade husi klube Dili United.

“Ofisialmente ita seidauk iha kompañia ne’ebé sai ajente ba transferénsia jogadór no durante ne’e. Jogadór Brazileiru sira ne’ebé mai joga iha ekipa selesaun nasionál, depois sira komesa joga iha indonézia no klube seluk iha Ázia ne’e, sira ne’e transfere husi klube ida naran Dili United, klube ne’e hanesan klube falsu ida no durante ne’e la eziste” tenik Portavós Amante Futeból.

José Luis deskonfia, responsavel ba máfia, apaga ona informasaun sira ne’ebé disponibiliza iha website FIFA.

“Informasaun kona-ba klube Dili United, uluk ita bele asesu iha website FIFA, maibé depois tinan rua, klube amante eziste, kuandu amante protesta, sira konsege halakon informasaun ne’e iha website FIFA no uluk ita loke website FIFA ita hetan klube hamutuk 30-resin ho naran Timor Raya, balun Atambua FC, sira rejista klube falsu barak, para depois no sira relata katak, ita iha ne’e kompetisaun la’o rame loos, maibé realidade kompetisaun foin mak komesa ho LFA, nune’e sira aprezenta relatóriu falsu hodi hetan orsamentu husi FIFA,” tenik nia.

Daudaun ne’e, Komité 12 Novembru mak hanesan responsavel ba realizasaun kopa 12 Novembru, nune’e vensedor kopa ne’e bele hadau Super Taxa ho vensedor Taxa Liga Amadora.

Vise Prezidente Komité 12 Novembru, Rogério da Cruz konsidera katak, klube Dili United iha hela prosesu kriasaun.

“Foin mak atu kria, provisóriamente estrutura iha ona, maibé sira seidauk simu pose, balun mai husi FFTL no balun mai husi Liga Amadora. Maibé, kona-ba transferénsia jogador, ninia xave ne’e iha FFTL,” dehan nia.

Iha parte seluk, Prezidente Klube Santa Cruz, João Campos rekoñese, iha emprezáriu balun mak hanoin hela atu kria klube ho naran Dili United.

“Iha emprezáriu no Dili oan balun mak hanoin atu harii klube Dili United, hodi partisipa iha Liga Amadora, no klube ne’e la'ós klube ne’ebé federasaun uza hodi sai hanesan ajénsia ba transferénsia jogadór, maibé klube Dili United ne’ebé federasaun rejista iha AFC ne’e ilegál no la rejistu iha notariadu no nunka tuir kompetisaun ofisial,” dehan nia.

Haree ba deklarasaun husi Dirijente Komité 12 de Novembru no responsavel Klube Santa Cruz, konklui katak, klube Dili United durante ne’e seidauk eziste, maibé iha entidade balun ne’ebé responsabiliza ba prosesu transferénsia jogadór Brazileiru ba klube seluk, no klube ho naran Dili United, ne’ebé durante ne’e la deskobre.

Koordenadór Amante Futeból José de Carvalho akuza dirijente FFTL, sai hanesan responsavel ba klube Dili United, hodi hetan lukru husi prosesu transferénsia jogadór ba estranjeiru.

“Ha’u hakfodak ne’e, ha’u moris boot no ha’u joga to’o katuas, maibé ha’u nunka rona klube Dili United nia naran no mai husi ne’ebé. Ne’e kestaun boot ida, tuir loloos federasaun mak hatene, tanba ita transferénsia jogadór husi nasaun ida ba nasaun seluk ne’e federasaun mak hatene,” afirma José de Carvalho.

Prezidente Klube Santa Cruz reforsa katak, FFTL sai hanesan responsavel ba krime transferénsia jogadór.

“Iha Timor seidauk iha ajénsia ba transferénsia jogadór, ajénsia ne’e katak pesoál ne’ebé harii kompañia iha mundu futeból, prosesu transferénsia jogadór responsabiliza husi ajénsia iha ne’ebé halo negosiasaun ho klube seluk hodi fa’an jogadór, maibé ba jogadór ne’ebé federasaun fa’an nunka joga iha Timor no kompetisaun rasik la iha, nune’e sira mak tenke responsabiliza” afirma responsavel klube Santa Cruz.

Iha parte seluk, Koordenadór Amante Futeból José de Carvalho hateten, klube Dili United hanesan rede máfia.

“Klube ida ne'ebé ne’e? Ita nia klube hamutuk 21 foin mak harii tinan 1, Dili United mai husi ne’ebé? Ne’e mak ema dehan siluman, ilegál sira, mafiozu sira mak ne’e, agora mafiozu halo sira tenke toma responsabilidade, halo buat ne’ebé la iha dehan iha maibé realidade falsu, ne’e mafiozu, agora sira lambe ona masin” deklara José de Carvalho.

Maibé, hataan ba akuzasaun ne’e, Vise Prezidente Federasaun Futeból Timor-Leste FFTL, Osório Florindo mós la rekoñese ezisténsia klube Dili United.

“Ha’u hatene Dili United iha ne’e laiha, iha karik ha’u la haree, ha’u hatene klube sira ne’ebé iha LFA, Dili United ne’e se nian ha’u la hatene, pelumenus joga iha divizaun 1 ka divizaun 2 ha’u la hatene, se ko’alia kona-ba klube, ha’u Vise Prezidente Ponta Leste,” afirma Osório Florindo.

Alende ida ne’e, dirijente FFTL ne’e mós la hatene prosesu transferénsia jogadór husi Timor-Leste ba estranjeiru.

“Ha’u nunka hatene, tanba ha’u la hatene transferénsia jogadór, ha’u transfere jogadór iha rai laran de’it ulun moras ona, agora ha’u urus fali transferénsia ba indonézia ne’e ha’u la hatene, se ita boot sira hanoin dehan iha ema ruma , ne’e husu diretamente ba ida ne’e, pelumenus ha’u la hatene, Dili United ninia sede iha ne’ebé? Sé mak prezidente? Ninia jogadór mak ida ne’ebé? Ha’u la hatene, maibé agora jogadór sira iha klube primeira divizaun ne’e ninia jogadór sira ha’u hatene hotu” tenik Osório Florindo.

Iha parte seluk, Sekretáriu Estadu Juventude no Desportu Leovigildo Hornay, hateten nia parte la iha lista husi klube ne'ebé eziste iha timor-leste.

“Finalmente ha’u seidauk iha lista husi klube sira ne’ebé iha mas iha klube foun balun mosu, klube sira ne'ebé joga iha primeira divizaun no segunda divizaun ne’e rejistadu hotu iha LFA, ne’ebé ha’u hanoin, ha’u hakarak buka hatene katak, klube ne’e tama iha sira foun ne’e ka lae, klube ne’e tuan? Maibé sira tuan ha’u hanoin ita hotu hatene, mais klube foun iha mós barak, ne’ebé sira harii atu tama iha segunda divizaun ka halo preparativus ruma para submete ba segunda divizaun” dehan Leo.

Baihira kestiona kona -ba sé mak responsavel ba prosesu transferénsia jogadór ba estranjeiru, governante ne’e rekoñese katak, transferénsia jogadór ne’e hanesan problema ida ne’ebé tenke rezolve.

“Ha’u hanoin buat sira ne’e hotu, ha’u halo ona pedidu ba parte hotu-hotu no federasaun rasik ami ko’alia atu bele sira fó, no ohin (24/1 red) ami enkontru no ita boot sira akompaña, ida ne’e mós ami ko’alia iha ami nia ajenda diskusaun para depoiz, buat ne’ebé sala no buat ne'ebé laloos ita buka atu korrije para iha futuru labele repete tan,” dehan Leo.

Maibé, iha momentu ne’ebé SEJD responde kestaun ne’e, ninia konsentrasaun hanesan buka buat ruma ne’ebé lakon iha estrada diresaun sional Dili.

Entrevista ne’ebé realiza loron 24 fulan Janeiru, ne’e iha edifísiu SEJD iha sional Dili verifika katak, husi governante nia matan iha buat ruma ne’ebé la la’ós, tanba la fó atensaun ba jornalista ne’ebé husu pergunta, kona-ba sé mak responsavel ba prosesu transferénsia jogadór.

Fó hanoin fila fali katak, klube ne’ebé rejistadu no tuir kompetisaun Liga Amadora Timor-Leste - LFA mak, Assalam FC Aitana Fc, DIT FC, Altetico Ulmar, Karketo FC, Kakusan FC, Benfica SLB, Nagardzo Fc, Lica Lica Fc, Y.M.C.A , ADR União, Benfica Dili, Sporting de Timor –Carsae FC, Académica Dili, Porto Taibessi, Ponta Leste Dili, Café FC, Zebra Baucau no Kablaki FC.

Husi klube ne’ebé rejistadu, klube Dili United la rejistadu no la partisipa iha kompetisaun liga amadora no taxa 12 de Novembru.

Daudaun ne’e, FFTL sofre hela sansaun husi Konfederasaun Futeból Ázia - AFC, tanba falsifika sertidaun jogadór Brazileiru na’in 12, hodi hetan naturalizasaun atu defende selesaun nasionál.

Sansaun ida fali maka, dirijente FFTL no Liga Amadora Gelásio da Silva de Carvalho mós sofre multa ho valór rihun $3.

Komité dixiplina AFC mós bandu selesaun Timor-Leste atu labele hola parte iha Taxa Ázia tinan 2023 no aplika multa ho valór rihun $20 ba selesaun nasionál.

Aleinde ne’e, Komité Dixiplina Konfederasaun Futeból Ázia kansela jogu internasionál hamutuk 29, ne’ebé selesaun nasionál reforsa husi jogadór naturalizadu no FFTL sei responsabiliza rihun $56, durante períodu probatóriu.

Nune’e jogu hotu ho totál 29 ne’ebé realiza tinan 2016 ba kotuk, atu manan ka lakon, AFC sei atribui rezultadu lakon-ba TL ho skore 3 - 0.

Problema ne’e, prejudika prestasaun Futeból Timor-Leste, Timor-Leste em termus ranking mundiál futeból.

Husi avaliasaun FIFA, ranking mundiál TL sa’e makas, porezemplu iha fulan Dezembru TL iha pozisaun 191, di’ak liu kompara ho nasaun sira iha Ázia hanesan, Srilangka no Pakistaun, ne’ebé iha pozisaun 195 no 197, maibé, ho sansaun ne’e ranking futeból Timor-Leste tun drastikamente.

Read 3077 times
Rate this item
(0 votes)