“Enkontru alargadu dezde hau nia mandatu, hahu kedas ho atividade hanesan hodi rona funsionáriu PN nia preokupasaun servisu”, dehan Prezidente PN Adérito Hugo  iha PN Kuarta horisehik.

Mekanizmu organizasaun nian, enkontru barak liu  ho Konsellu administrasaun hanesan xefe departamentu no diretór sira.

Tanba ne’e ho atividade enkontru alargadu ne’e hakarak atu rona informasaun direita husi funsionariu sira durante hala’o servisu iha PN.

Ne’e hanesan dalan ida atu hatene preokupasaun no difikuldade ne’ebe mak sai hanesan obstakulu  hodi la suporta dezempeñu servisu funsionariu administrasaun PN.

Funsionáriu PN iha regra ne'ebé  durante ne’e kesi metin sira hodi organizadu no dixiplina iha servisu fatin mak hanesan kontrolu ba prezensa ne'ebé on time, tama sai servisu tuir lei Funsaun Publika, kuandu atraja liu minitu ida tenke kua sira nia saláriu.

Konsellu administrasaun dezeña planu ne’e atu eduka funsionariu sira bele disiplina ba tempu ne’ebe  determinadu ona iha lei Funsaun Publika, tanba koalia korupsaun ne’e la’os ba osan deit, maibe prosesu hanesan ne’e mos hola parte hotu iha korrupsaun.

Dixiplina servisu hodi kumpre oras servisu ne’e importante tebes maibe ne’e kuandu la kumpri ona, oinsá mos ita atu koalia kona ba dezempeñu servisu.

Nune’e mos parte ne’e seidauk hare  ba produtividade servisu nian tanba ne’e atu ba atinje ida ne’e funsionáriu ida-idak tenke buka organiza aan didiak.

“Jestaun ida ne’e mak ami halo husi konsellu administrasaun hodi kontrola oras servisu nian”, dehan Hugo.

Parlamentu mos iha estatutu funsionáriu PN, alende ne’e mos iha lei orgánika ne’ebe  kondisiona  funsionáriu sira nia servisu atu nune’e sira bele sente fatin ne’e apropriadu atu halo servisu.

Dezempeñu servisu funsionáriu PN iha mandatu tinan 5 nia laran, servisu funsionariu sira nian mais dinámiku tebes kompara ho tinan hira ba kotuk.

PN komesa goza nia estatutu autónoma finanseira administrasaun no patrimóniu iha Fevereiru 2016.

Pontu kiik oan ida mak governu sentrál sentraliza ona servisu autónoma hanesan ne’e,  ita mos komesa oinsá atu atualiza mákina administrasaun parlamentár  atu bele dinamiza kompeténsia ne’ebe  governu sentral atribui mai orgaun PN.