Lenia nudar oan-feto husi Yulianto ne’ebé Joaquim kaer hodi dansa. Maibé haree katak Joaquin dansa liu liña, Yulianto foti katana hodi ta’a nia.

Tuir akuzasaun husi Ministériu Públiku liu husi julgamentu ne’ebé preside husi Juiz Singular Ana Paula iha Tribunal Distrital Dili (TDD) katak, iha loron 12 Janeiru 2014, (iha festa ida) iha Bua-Laran, Manleuana-Dili, lezadu Joaquim ba husu arguidu nia oan feto hodi dansa.

Bainhira lezadu dansa hela, arguidu halai ba kios laran, foti samurai rua, kaer iha liman sorin-sorin, sai mai liur, no ta’a dala tolu ba lezadu nia kabas parte karuk. Lezadu hetan kanek no halai atu salva an, arguidu duni tuir nafatin no  foti ai baku tan iha lezadu nia kotuk laran dala 3.

Tuir reprezentante MP, Prokuradór Remiza de Fatima da Silva, arguidu nia hahalok ne’e livre no liberdade hodi hakanek ema nia isin lolon tan ne’e MP akuza arguidu sai hanesan autór material ba krime ofensas integridade simples tuir artigu 145  kodigu penal TL.

Hatan ba akuzasaun, arguidu Yulianto dehan faktus ne’e balun loos no balun sala.

Nia dehan, nia la foti samurai maibé foti katana no la’os arguidu mesak mak halo problema maibé ema barak mak foti katana no ai hodi hobur iha festa laran.

Iha fatin hanesan lezadu Joaquim dehan, iha momentu ne’eba nia husu duni arguidu nia oan feto dansa maibé derepente de’it arguidu sai husi kios laran lori katana hodi halo problema iha festa laran.

“Ha’u la hatene problema saida mak arguidu baku no ta’a iha ha’u-nia kotuk laran no halo  kabas sai mean no bubu makaas,” dehan lezadu ba Tribunál.

Tuir testamuña Auxilio Agosto, iha momentu ne’eba mosu duni problema iha festa laran maibé laos arguidu mesak de’it mak halo problema maibé ema barak mak halo barullu iha festa laran. Ikus mai, nia dehan, lezadu nia kabas mean no la hatene see mak ta’a lezadu.

“Se karik deskonfia arguidu mak foti katana ta’a duni, lezadu la aproveita katak mate, se lae hetan kanek todan,” dehan nia.

Hafoin rona deklarasaun ne’e, tribunal submete kedas ba iha alegasaun final.

Liu husi alegasaun MP husu ba tribunal atu fó kondenasaun ba arguidu iha kodigu penal liliu artigu 145.

Entretantu, arguidu nia defensór Manuel Expostu husu ba tribunal atu absolve tiha kaju ne’e tanba arguidu nia hahalok hodi kaer objetu hanesan katana mak ta’a lezadu bubu de’it, la ta’a ulun fatuk no de faktu kuandu ema ta’a loloos mate, se la’e kanek boot.

Tribunal adia fila fali kazu ne’e ba iha loron 7 Marsu 2017 tuku 16.00 Otl loraik hodi rona desizaun final.