Rui ne’ebé agora asume kargu Primeiru Ministru bolu atensaun liu ba kampaña prezidensiál topu (dala ikus) ne’ebé sei hala’o iha kapitál Dili, Sesta (17/3).

Tuir kalendáriu ne’ebé fó sai husi Comissão Nacional Eleições (CNE), iha loron ne’e kandidatu boot rua mak sei halo kampaña hanesan kandidatu prezidente Francisco Guterres ‘Lu-Olo’ no António da Conceição ‘Kalohan’.

“Ha'u lori lideransa partidu FRETILIN nia naran, katak hakarak bolu atensaun nafatin Kamarada sira dia 17 agora ita halo kampaña iha Dili, ne'ebé ita sei halo mobilizasaun boot ida”, tenik Rui, iha Ai-Mutin, Komoro, foin lalais ne’e.

Nia husu ba militante no simpatizante sira bainhira la’o karik tuir liña no tenke kumpre kódigu tránzitu nian. Labele provoka malu tanba sei la manan buat ruma husi konflitu no violénsia.

Respeita Separasaun Podér

Entretantu, membru CCF ne’e mós husu ba kandidatu prezidente repúblika sira atu hatene ona sira ninia kompeténsia no knaar antes asume kargu. Nune’e, labele konfuzu ho separasaun podér órgaun estadu sira.

Nia esplika, Prezidente Repúblika labele sai fali Primeiru Ministru. Kompeténsia husi órgaun estadu rua ne’e la hanesan.

Prezidente Repúblika nia kompeténsia mak sai símbolu estadu, símbolu unidade nasionál no símbolu no garantia ba funsionamentu instituisaun ho di'ak labele namkari labele naksobu.